الثورة فكرة

الثوره فكره مش ميدان
والفكره ماسكه فى الحيطان
مبدوره فتراب الغيطان
ساكنه الشوارع والضمير
الثوره مش موقف سياسى
ولا توهه فى رص الكراسى
ولا حزب اعلنله انحيازى
وامشى وراه زى الضرير
الثوره ناس
قادره تصبر حبه فإشارة مرور

عارفه صاحب الفرن لكن برضه واقفين فى الطابور
الثوره ناس
قادره تضحك فى الوشوش
قادره تسمع راى تانى حتى لو مابتقبلوش
الثوره ناس
الثوره احساس بالخلاص
من كل امراضنا القديمة

شعر: نصر الدين ناجى